الاثنين، 30 يوليو 2018

قصة دير الخير إرجع عليك بالشر 9isa hazina

🔴 قصة صغيرة :
عنوانها : دير الخير إرجع ليك بالشر


/
/
قصة واقعية : ماشي ديالي ولاكن مولاها عاودها ليا وعجباتني وبغيت ننشرها

. وهي كالتالي :
أ.م.. كانقرا فالباكالوريا أو بالأحرى عاد ساليت الباكالوريا حيت الصيف هاذا خديت الباك ب 14:36 علوم فيزيائية والخا كنت معول على كتر باش ندخل للمدارس ... أنا إنسان مجد لا بلية لا والو الرياضة والقراية صافي ماعنديش مع البنات ماشي مكانهضرش معاهم كانهضر ولاكن مكانتصاحبش
 حيت كنت مركز على مسيرتي الدراسية ومالين دار مزيريني مزيان باش نقرا نولي شي حاجة زوينة فالمستقبل .. المهم نرجعو للصيف

 والأجواء حارة ولاكن الفرحة د الباك كاتنسيك كولشي ...
واحد النهار فكرت نمشي لبحر فالصيف وصافي النهار لاخر مشيت لبحر وحد وقبل مانمشي الوليدة تبعاتني نص طريق لا مامشيش ومن بعد قنعتها ولات تقول ليا ماتعومش
 راه البحر خايب راه داك نهار غرق واحد
 المهم القصص د الحزن والخليع باش تقنعني مانعومش
 قلت ليها صافي مانعومش ومشيت ركبت طوبيس مشيت وحدي ولابس شورط وتوني ديال Psg وبنادم سبورتيف كانبان عامر مع الرياضة ولابار فيكس

ماعليناش وصلت للبحر درت المزيكا ديالي ونضارات ووقفت كانتشمش شوية مشيت لعب التنس او الراكيت مع واحد الدري ولعبت كورة غير كانجونكليوها
 مهم واحد الشوية ريحت وتقابلت مع البحر نتأمل الطبيعة كيفاش خلقها الله سيييير واحد الشوية ضرت لقيت واحد القاصرة زوينة تشوف فيا وتبسم ليا وتبسمت ليها ههه  حيت أنا ماشي تبسمت ليها غير هكاك لا أنا من عند الله نشوف بنادم كايبكي كايهرجو ليا الدموع نشوفو كايضحك كانضحك والخا غير فالتلفازة ههه ... نرجعوا للبنت هههه جبدات تيليفون وبقات تدير شي ستونات ديال هاك النمرة ولا أرا نمرة ههه
وانا البنت جاتني زوينة وبحكم أنني مكانتصاحبش قال ليا الأنا الأخر ديالي هاذي هي الفرصة فاش تزعم وتصاحب أول مرة هه ( الأنا الأخر هو الشخصية ديالك التانية فنفسك ) بنادم كايحشم مكايعرفش اهضر فبحال داكشي ديال تصاحبي معايا ولا لا وانا نمشي للبحر نعوم ... دخلت كانعوم ونعوم ونعاود نعوم ههه واحد شوية لقيت ديك البنت حدايا فالماء .. بارد الماء خويا هه قلت ليها اه .. وشوية جات وبقينا نهضرو وانا عرفتها اش بغات قالت ليا ممكن تعلم ديك العومة لي درتي تاع الغطس ههه بنادم حشمان قال ليها غير نزلي تحت الماء صافي المهم شحاال .. وسط الماء وفاش خرجت تبعاتني ومشيت للبلاصة وجات حدايا وكانت معاها واحد القاصرة اخرى .. كايهضرو معايا انت من انا بلاصة واش مصاحب واش هكا ولا هكا لا لا لا وأنا نسولهم على شي حاجة تفيهة كيفاش حتى جيتو للبحر وحدكم بلا ماتجيو مع واليدكم .. بقاو اضحكو ههه يعني ضاسرات
المهم العشية فاش بغيت نروح نرجع لدار عاد وقع الفيلم البنات مشاو قبل وخداو النمرة ديالي
... انا غادي كانتمشا ومزك لأغنية غربية ودخلت مع واحد الجرد بجانب البحر ريحت فيها كانقسي شي ماكلة جبتها معا
واحد الشوية واحد الجوج 2 دراري جايين بالجرى كايجريو وهازين صاك فاليد ... دخلو مع الجردة ولاحو واحد فالربيع وهرب ... وانا شفت فين لاحو وهربو حضيتهم مشاو بعدو وكايجريو حتى ركبو تاكسي ومكانش تابعهم حتى واحد ....
الجزء التاني :
🔴 الجزء التاني : من قصة #دير_الخير_إرجع_عليك_بالشر


كما قلت ليكم هادوك هربو وباينين شفارة شفرو داك الصاك وهربو ... ولاكن أنا شفت الصاك فين مخبي وجلست تما لمدة 30 دقيقة واحد الساعة وقفت ومشيت لداك الربيع فين كاين الصاك هزيتو وتمشيت شوية

ماقلبتوش نزلت لجهة لي طلعو منها الشفارة وهاز الساك في يدي امكن نلقا مولاتو نعطيه ليها ندير الخير فقط
 والله أيجازيني ... نزلت قلت شي نصف ساعة والوا مالقيت واالووا تما غير شي دراري كايجريو وارجعو وناس عادية تمشي وتجي بنات ودراري وعائلات ... وانا نقرر نديه معايا ومشيت لجردة تاني وقلبتو ماتعرف تكون شي حاجة خطيرة تما


حليتو أش لقيت
 بفف ملابس داخلية د البنت ولقيت مرايا والمكياج ولقيت مشطة وباكية د الكارو فورتينا هههه والأهم كان فالجيب لاخر فالساك
 تيليفون كالاكسي J7 و 400 درهم وشي صرف تخلعت شفت داكشي نديه لدار لا الواليدة ماتخلنيش ندخل داكشي ...
وانا نقول بلاتي الا صونا تيليفون نجاوب مولاتو وندير معاها ونرعو ليها ونتهنا وهي تهنا كدللك

صافي مشيت لداار دوشت وماوريتش الساك لمالين دار درتو وسط الكارتاب ديالي ... مهم دوشت وخرحت قسيت ومشيت لتيليفون ولقيت بنادم صونا والنمرة مكتوبا فها اختي حنان وريحت واحد 20 دقيقة وصونات تاني ديك النمرة حنان
وهرت معاها ألووو  وهي تقول ألوو خويا السلام عليكم أربي إما رجع ليا التيليفون غادي نعطيك لي بغيتي عافاك الله احفظك المهم ماسكتاتش طاطاطا
وقلت ليها شوفي اختي راه انا لقيت هاد تيليفون وسط الساك مخبي فالجردة الفلانية وقالت ليا عافاك رجعو ليا حشومة تشفرو ليا وهو إطلع ليا الدم وانا نقول ليها راه ماشي انا لي شفرتو ليك أبنادم راه انا لقيتو المهم شي 15 دقيقة د الهضرة حتى قتنعتها بأنني لقيتو وقلت ليها كيفاش لقيتو وهادوك لي شفروه هربو ... وهي تقول ليا صافي أخويا جيبو ليا وخود دوك الفلوس ديهم ماتجيبهومش معاك وشكرا ليك بزاااف وقلت ليها العفو أخي ... المهم درنا البلاصة فين أنتلاقاو ومشيت شديت التاكسي ليها وصلت البلاصة وريحت تما فواحد القهوة مع درت معاها ساعة تصوني ليا .... دازت ساعة بالضبط والتيليفون كايصوني وهضرت ألوو ختي فينك قالت ليا فينك انت قلت ليها فالقهوة الفلانية اش لابس لا هكا وهاكا وانت فينك قالت انا قريبة باقا فالتاكسي قالت ليا خرج من القهوة وتمشا وخرجت وكانتمشا واحد 20 تانية ونقلب وعيني فين هاد بنادم كانشوف فالناس امكن هذي امكن هذي مع كولشي هاز تيليفون *.*
ووااحد الشوية وانا غاظي نتمشا مانكدبش عليك ماعقت على راسي حتى لقيت راسي مسرح فالشارع  جاتني واحد الضربة من اللور وواحد النص ماعقلتش على راسي كاع امتى طحت حيت الغفلة  وبزااف دبنادم شادني شفاار شفاار شفار
وانا ساكت حيت دخت وكانشوف فبنادم شي كايضرب شي كايجبد المهم كانو لي جاو معاها هما لي ضربوني وكانو دايرين مع البوليس كانو معاهم المهم شفت البوليسي دفع هاداك لي ضربني وقال ليع علاش ضربتيه سييير واحد الشوية كاتبان ليا واحد البنت وأشمن بنت بحال إلا جبدتيها من القادوس الحشرة أجمل منها وكانت تبان فالصورة زوينة حيت كانت دايراها فالبروفيل د التيليفون ... المهم جات حدايا وشنقاتني وتسب تحت السمطا وهي تدفل عليا ( شوووف اللي بغا ادير خير فين كايطيح  ) المهم داوني البوس دارو ليا المينوط وداوني للكوميسارياء وتما كانت الصدمة الكبرى 😣
الجزء التالت : 
🔴 الجزء التالت قصة : دير الخير إرجع عليك بالشر 


 الصدمة الكبرى تما هي آش منك يا عصا كليت فالكوميسارياء وكانو شي وحدين حتى هما السرقة كلاو العصا حتى طاحو معا لقيتهم تما ... المهم قالو ليا علاش تشفر وعلاش شفرتيه سير خدم وانا نحلف مادرت شي حاجة ونبكي 
 والله مادرت شيحاجة أشاف وانا عمرني دخلت لكوميسارياء الا فاش صاوبت لاكارت وقالو ليا اش كاتدير فحياتك قلت ليهم كانقرا عاد شديت الباك ب 14 وشاف فيا وااحد قال ليا 14 فالباك وتشفر أش علماتك المدرسة وانا نشد واحد الطرشة حتى ضرت لهيه ... المهم دخل واحد البوليسي مالوو هذا شفاار وايلي علاش اش دار شفر ساك فالبحر وهو اجي قال ليا علاش شفرتيه قلت ليه ماشفرتوش ومن طريقة د الكلام ديالو كان بوليسي طيب وظريف وقال ليا عاود ليا القصة كيفاش وعادت ليه كولشي وهو اقول ليا اه ولاكن المشكلة هي قالت ليك انت لي شفرتيه وشافتك فعينينيها والقضية صعيبة شوية عندك اولدي 
💢 صافي حسيت بالكورة الأرضية تقلبات عليا وتفكرت الباك ب 14 والتهمة اذن كولشي ضاع كولشي مشا مابقاش مستقبل ومابقا والوو والأكتر من هذا هو الوليدة الا عرفات صافي أتمرض ولا اتدير شي حاجة 


المهم قلت لداك شاف ممكن نصوني على مالين دار من عندك وصونيت ليهم قلت ليهم اجيو للكوماساريا الفلانية انا فيها وقتع عليا البوليسي المكالمة من بعد 30 دقيقة جاو مالين دار فالطوموبيل ودخلو للكوميسارية لقاوني دايرين ليا المينوط وباقين فالتحقيق وكايسولوني وجات الوليدة تجري دخلات عندي مالك اش جرا ليك علاش دايرين ليك هادشي وتقولها بالجهد وهو اقول ليها واحد البوليسي سيري ا المدام تسناي تما هنا ممنوع تجي ليه ومابغاتش حتى تعرف اش كاين 
 قالوا ليعدها ولد شفااار 
 وهي تبدااا نيت تغوت تما وتبكي حيت عارفة ولدها مكايشفرش لا لا ولدي ماشي شفااار وهما اهرجوها لتما فين اتسناو ومشا الوليد عند واحد تما وعاود ليه كولشي اش كاين صافي كلمة شفااار هي الخلاصة د الفيلم .
وصافي من بعد ساعتين وقال الوليدة اواا طلقوه امشي لداار امتى اتلقووه ؟؟
قال ليها واحد تما غير سيري لدارك راه ولدك أيبقا معانا هنا أيبات 48 ساعة عاد أيمشي عند الوكيل للمحكمة 

صافي تما فين طاحت الوليدة سخفاات  وفديك اللحضة القوى ديالي انهارت كاملها خصوصا فاش تشوف الوليدة ديالك تبكي أوووف ... يتبع 
الجزء الرابع : 
🔴 الجزء الرابع من قصة :
_دير الخير إرجع عليك بالشر
.
.
صاافي الوليدة فوااحد الحالة صعيبة وانا كذلك محطم نفسيا 

صافي داوني جوج د البوليس نزلوني مع لاكاب وسط الكوميساريا ومع حنا نازين مع دروج وكانسمع الهضرة تحت السمطا والغوات وبنادم كايقول وتلق الماء والله انعل ليك .... سير أنواع الشتائم نزلنا وهو إحل البوليسي واحد السياج يعني باب د الكريياج ودخلنا وانا نشوف الكارثة والصداع شي 4 شومبرات وكل شومبر بالكرياج ديالو فيه المعتقلين وكاين ديال البنات هو الأول حدا الباب وحداه شومبر د القاصرين وحداه شومبر د الناس دريوشين ناس كبار والأخير ديال المجرمين المهم غرفة قاسمين بيناتهم غير بالكرياج وصافي وكانت الأوضاع صعيبة بزااف بالنسبة لبنادم اول مرة إشوفها ... المهم أنا داوني لعند المجرمين مع شافوني صحيح بالرياضة وكانبان زعما كبير وانا فالحقيقة ديك ساعة يالله كملت 18 سنة ... المهم دخلوني وسدوو عليا ومشاو ودخلت انا ريحات فواد البلاصة وحدي وهادووك لي معايا كايوفو فيا وهما من الوجوه ديالهم باينة موالفين تما بففف المهم واحد الشوية نزل واحد البوليسي وهو اقول ليا اجي هاك وكانت شي ماكلة صيفتها ليا الواليد شديتها وحطيتها حدايا وماكليتهاش عطيتها لبنادم كلاها المهم نعس الليل كاملو فوق الأرض بلا ماكلة بلا والوو والخا ماداني نعاس تال 6 دصباح وفقت فال 7 نفس الشى لقيت مالين دار جابو ليا فطور والخا ماشفتهموش كليت شوية باش عتقت وانا تلفت المهم هدوك لي معايا مشاو فيا غالطين قالو واش شي مجرم انا وسولني واحد علاش جابوك وانا نعاود ليه المشكل وبدا كايضحك وقال علاه هاد البلاد باقي فيها الخير ... المهم لوخرين كايضحكو وشي وحدين تفهمو الوضع وصبروني 
واحد شوية خرج نص د الشومبر مشاو للمحكمة وبقينا حنا نص وشوية بقاو لوخرين ادخلوهم تاني عندنا الكوميسارية عمرات مشيت لواحد بلاصة فيها كاشة ريحت تما وجا عندي واحد تما قال ليا نوض تما وهذا كبير شي 28 سنة وقلت علاش ؟ قال ليا نوض والسلام قلت ليه اللا مانضوش وهو ضربني بواحد البينتا فالرجل وانا نوض ليه رفعتو بواحد النص وسط تما وامام الملأ انا صغر منو ولاكن صحيح عليه وشنقت عليه مع لارض حتى فارقونا وبقا كايسب فيا وخليتو هانية حتى جا بوليسي خرجو داه لشومبر آخر حدانا ومزال كايسب فيا حتى ضارو فيه لي حداه .... مهم دازت 48 ساعة جاو البوليس مونطاونا دارو لينا المينوط انا وواحد زداونا كل 2 ناس فمينوط حتى طلعونا فالصافيت كنا 8 ولا 9 و4 بنات من الجهة الأخرى حيت صطافيت قسموها بالكرياج ...
سيير وصلنا للمحكة دااازو دوك دراري عند الوكيل شي خرج حيت ماعندو والو غير سكران ولا عندو جوان شي لاخر سنا على الحبس وبصم حيت الوكيل كايعرف غير لي فالمحضر د البوليس سيير بقينا تقريبا تما تال شي 18 د العشبة بلا ماكلة بلا والوو مهم دازت ديك المحكة صيفتو بنادم فالصطافيت ديريكت للحبس ...



وي الحبس اللي عمرو توقع امشي ليه شي مرة 
الجزء الخامس : 
🔴 الجزء الخامس من قصة : 
/ دير الخير إرجع عليك بالشر :
.
.
من بعد مامشات الصطافيت او الفاركو مسافة توقفت وقبل من داكشي فاش عاد خرجنا من المحكمة فاش داونا فالصطافيت بانو ليا بزااف د صحابي تما وناس د السيكتور وباينة كالع ليهم الدم من وجهم وكانو كايشوفو فأي صطافيت خرجات دزنا حداهم وشافني واحد وقال ليهم هاهواك هاهواك وكايشيرو ليا 
 سيير الصطافيت مشاات شادة طريق الحبس من بعد مسافة وقفات ومع طليت قال ليا واحد هاذا هو الحبس أعشيري الا عمرك شفتيه وكانت فعلا أولا مرة نشوفو من الخارج وما بالك بالداخل وهو اقول ليا الا دخلتي خرج عينيك وماتبانش ضعيف تما وماتبكيش الا كاتعاود لبنادم راه بنادم تما خايب
 المهم وصاني زعما قلت ليه شكرا وهو اقوليا ماتبقاش تقول شكرا قول الله احفظك باش تبان قاسح شوية راه انت صحيح .... سيير دخلوونا ومن بعد دزنا فعدة اجراءات وتقلبنا وشحال من مرحلة حتى داونا كل واحد فين داوه مفرقين انا دخلت تما ولقيت تما بنادم مدابز واحد 2 مدابزين شافو الحارس فاش دخلني هما احبسو دخلت وهما ابداو تاني مدابزين وحتى واحد مكايفارقش حتى واحد والبونية نايضة وبنادم اتفرج واحد اللحضة واحد كلا العصا مزيان ومشيت كانفارق فيهم وحدي وقال ليا بنادم حيد تما وانا نريح حتى تفارقو وحدهم .... مهم داكشي لي كاين تما الا دابزتي ... سير جا عندي واحد تما قال ليا انا هو شاف شومبر وكان كبير شوية وخاسر مخزز وقلت ليه ومن بعد قال ليا مالك نيتك خايبة قال ليا زعما الا عندك شي مشكل مع شي واحد هنا قلها ليا وعطاني القانون ديال الشومبر وقلت ليه صافي ومن بعد قال علاش جابوك وقلت ليه وهو اقول هانية داكشي كولشي دايز ومرة تاني سير دير الخير ف الق......ب مهم فداك شومبر لقيت 2 دراري كايعرفو خويا وقالو ليا واش خو فلان واش ساكن فتما قلت وي وتعاشرو معايا وعطاوني كاشا وقسيت معاهم مع الصباح عطاوني تيلي كارت وصونيت لمالين دار فاش خرجنا لاكور اي الساحة وهضرت معاهم وهضرت معا الوليدة وقالت ليا ياك مدابزتي تما ولا ضربوك قلت ليها لا راه كاين مع صحاب الخوادري هنا ضريفين وبدات تاني تبكي وسديت التيليفون ومشيت ريحت فلاكوور حتى لقيت مع بزااف دراي نعرفهم ماكنتش نهضر معاهم ولاكن كانشوفهم حيت هما حباسا موالفين وبداو اقولو ليا اجيا انت اش جابك هنا المسخوط ياك انت غير المدرسة والرياضة ولانطريما المهم قلت ليهم المشكل وقال ليا واحد دير محامي فالجلسة ....

دازت شي يامات قليلة داوني للمحكمة ودوت عند القاضي وكانت المحكمة عامرة بالناس وكولشي اتفرح لدرجة انني دورت راسي بان ليا أستاد د الفيزياء لي كان صاحبي بقا فيا الحال وكانت هذيك البنت لي تشفرليها الساك 
القاضي : واش انت هو فلان بن فلان بن فلان 
أنا : اه هو انا أستاذ 
اش كاتقول فداكشي لي علاش جابوك 
انا : داكشي كاملو كدوب وانا مادرت والو 
والضحية جات وقال ليها القاضي :
انت هي فلانة بنت فلان بنت فلان 
هي : اه اناهي 
القاضي : واش هاذ الشخص هو لي سرق ليك الساك 
هي اه هو انا عاقلة عليه مزيان 
.... من بعد وقت حكمت المحكمة بالحبس لعدة أشهر ... ولاكن ماشي هو الحكم النهائي باقي الإستئناف من بعد 20 يوم او 40 يوم 
دازت ديك المدة د 25 يوم او اكتر بقليل وسط الحبس جا وقت الإستئناف نيت ودارو مالين دار محامي نيت وكان محامي معروف واعر 

الجزء السادس : 

🔴 الجزء السادس والأخير من قصة : 
دير الخير ارجع عليك بالشر :
*.*
^.^
/:
من بعد جات وقت الإتئناف والمحاوي بحت فالقضية وهضر معا فين وقع هادي وامتى وعطيني البلاصة بالضبط وقلت ليه حدا واحد البلاصة وديك البلاصة معروفة مزيان واحد البلاصة سياحية وفيها وقلت ليه من حداها خرجو الشفارة مع الوقت الفلانية وعطيتو معلومات بزاااف المهم مشا قلب مزيان فالقضية ومشا لديك البلاصة وتما منين دازو هو والوليد وبالضبك ديك البلاصة فيها كاميرة شادة الزنقة من هنا وكاميرة شادة لجهة الأخرى وتما بالليل كاين ضو مزيان / دخلو تما ومن بعد ماطلبو هادوك اللي تما شحال رجعو ليهم الكاميرا وبالضبط داك النهار لي قلت ليه ونفس الوقت حتى كايبانو ليهم الشفارة دايزين كايجريو واضحكوا وهازين نفس الساك تما فرح الواليد وقالها للواليدة وقال ليهم المحامي مايقولو ليا والو المهم المحامي جمع الأدلة القاتلة ... نهار الإستئناف دخلت واش انت فلان اه انا فلان وبدا المحامي كايهضر وكايهضر وعطاه الصور ديال المجرمين و عطاه والدليل القاطع على ان المتهم بريئ .... سييير كايهضر ومن تما عرفت راسي امكن نخرج وديك لي تشفر ليها الساك مكانتش مجاتش كاع داك نهار ... ومن بعد قال ليا القاضي عندك ماتزيد قلت ليه لا ..... بعد وقت حكمات المحكمة بالبرائة وفاش نطق بالبرائة حتى سمع الحضور لي كانو اتفرجو غوتو بالفرحة وفاش شفت فيهم لقيتهم صحابي كانعرفهم من سيكتور واللي قراو معايااا 


من تما خرجنا رجعنا للحبس تاني مشيت جمعت حوايجي وخرجوني الحراس لبلاصة اخرى فين جلست وقبل مانخرج كاينة واحد الحاجة تما اي واحد كايبغي اخرج كايسلخوه الدراري ولاكن غير بالضحك كايديرو ليه زيف فالراس على غفلة ولوخرين العصا ههه المهم كليتها وخرجت لواحد البلاصة الحوايج خليتهم تما جمعتهم ومن بعد فرقتهم عليهم .. سيير حتى دوزت جميع المراحل د الخرووج دزت فشحال من مرحلة وهاهو باب لي بقا على الحرية الحمد الله 
الباب تحل ومعا تحل والخا الضلمة مع لليل فاش خرجت بانت ليا الواليدة والوليد 
 وكانو صحابي تما مشيت عندهم وكولشي فرحان بيا مساكن تما عرفت راسي محبوب بين الناس ...
مشينا لداار الداار عمرات بالناس والأصدقاء وكولشي فرحااان 

ومن بعد صيمانة دفعنا للمحامي ضوسي تابعت فيه هذيك لي تاهماتني باش حتى هي تعاقب ولاكن مزال ماشدوها هربانة او ماعرفت فينا بار مجليا ...المهم هو الحمد لله فالحرية وعرفت بزااف د الحوايج والمهم برائة .
.
.
.
كانت هذي أجزاء مختصرة من قصة واقعية :
والسلام وشكرا على حسن الإنصات
.
النهاية 
تعليقاتكم محفزة إخواني

ليست هناك تعليقات:

إرسال تعليق